АКШнын президенти Дональд Трамп Сауд Аравиясы менен жарандык өзөктүк инфраструктураны өнүктүрүү боюнча 30 жылдык келишимди жактырды. Документ падышалыкта уран байытуучу объект курууга мүмкүнчүлүк бериши мүмкүн. Бул тууралуу The Wall Street Journal америкалык аткаминерлерге шилтеме берүү менен жазды.
Долбоор миллиарддаган долларга бааланууда
Келишим Сауд Аравиясына жарандык өзөктүк энергетиканы өнүктүрүүдө америкалык технологияларды колдонууга шарт түзөт. Долбоордун жалпы наркы ондогон миллиард долларга жетиши мүмкүн жана аны ишке ашырууда АКШнын компанияларына негизги роль берилери айтылууда.
Уранды Сауд Аравиясынын аймагында байытуу маселеси дароо чечилбейт. Адегенде эки өлкө биргелешкен изилдөө жүргүзүп, мындай объектти куруунун зарылдыгын жана мүмкүнчүлүгүн аныкташы керек. Жыйынтык оң болсо, америкалык компаниялар уран байытуучу ишкана курууга катыша алышат.
Келишим Конгресске жөнөтүлөт
Маалыматка ылайык, документке АКШнын энергетика министри Крис Райт кол койгондон кийин ал Конгресстин кароосуна берилет.
Конгресс келишимге каршы чечим кабыл ала алат. Бирок президент мындай чечимге вето койгон учурда аны жокко чыгаруу үчүн мыйзам чыгаруучулардын үчтөн экисинин добушу талап кылынат. Ошондуктан келишимге бөгөт коюу оңой болбой турганы белгиленүүдө.
Уран байытуу кооптонууну жаратты
Айрым америкалык конгрессчилер жана өзөктүк куралды жайылтпоо боюнча эксперттер Сауд Аравиясына уран байытуу мүмкүнчүлүгүн берүү Жакынкы Чыгыштагы өзөктүк атаандаштыкты күчөтүшү мүмкүн деп кооптонушууда.
Сынчылар документте өзөктүк объектилерди көзөмөлдөө жана текшерүү боюнча жетиштүү кепилдиктер жок экенин айтышууда. Сауд Аравиясы болсо программа электр энергиясын өндүрүүгө багытталганын билдирип келет.
Келишим азырынча расмий түрдө толук жарыялана элек. Анын так шарттары документ Конгресске берилгенден кийин белгилүү болушу күтүлүүдө.
