Үлпөт тойго 70тей конок катышты
Дүйнөдөгү эң белгилүү YouTube-блогерлердин бири MrBeast, чыныгы аты-жөнү Жимми Дональдсон, сүйүктүүсү Тея Бойсенге үйлөндү. Блогер бул тууралуу Instagram баракчасына үлпөт аземинен тартылган сүрөттөрдү жарыялап кабарлады.
Сүрөттөрдө Жимми Дональдсон ак түстөгү пиджак, кара шым жана көпөлөк галстук тагынып турганын көрүүгө болот. Ал эми Тея классикалык үлпөт көйнөгүн тандаган.
Тея Бойсен да кубанычын социалдык тармактагы катталуучулары менен бөлүштү.
«Мен MrBeast менен тааныштым. Бул менин жашоомдогу эң сонун күн болду», — деп жазды ал үлпөт сүрөттөрүнүн алдына.
Үйлөнүү үлпөтү жеке аралда өткөн
People басылмасынын маалыматына караганда, үлпөт аземи британиялык ишкер Ричард Брэнсонго таандык Некер жеке аралында өткөрүлгөн.
Салтанатка жубайлардын жакындары жана достору — жалпысынан 70тей адам чакырылган. Жаңы үйлөнгөндөр майрамдын башка майда-чүйдөсү тууралуу азырынча кеңири маалымат берише элек.
Миллиардер, бирок апасынан акча алат
Үйлөнүү тоюнан бир нече ай мурда MrBeast салтанатка даярдык көрүп жатканын айтып, айрым чыгымдарды жабуу үчүн апасынан карызга акча алганын билдирген.
Бул билдирүү социалдык тармактарда кызуу талкууга алынган. Айрымдар блогер финансылык көйгөйгө туш болгон деп ойлошкон. Бирок Дональдсондун айтымында, анын жеке каражатынын аз болушунун башка себеби бар.
«Менин жеке өзүмдө акча аз. Анткени тапкан каражатымдын дээрлик баарын кайра бизнеске жумшайм», — деген ал.
Маалыматтарга ылайык, блогер кирешесинин негизги бөлүгүн Beast Industries компаниясын өнүктүрүүгө багыттайт. Компания MrBeast’тин YouTube-каналдарын, видеолорун, товарларын жана башка долбоорлорун башкарат.
2024-жылы компания видеолорду тартууга болжол менен 250 миллион доллар сарптаганы айтылган. Ал эми Beast Industries компаниясынын 2025-жылдагы кирешеси 899 миллион долларга жакындашы мүмкүн деген божомолдор болгон. Бизнестин жалпы баасы 5 миллиард долларга чейин бааланган.
MrBeast’тин видеолору ири бюджет, масштабдуу сынактар жана чоң акчалай байгелер менен айырмаланат. Ошондуктан блогер тапкан кирешесин жеке жашоосуна коротпостон, жаңы контент жана долбоорлорго кайрадан инвестициялайт.
Тея Бойсен ким?
Тея Бойсен — Түштүк Африкадан чыккан стример, жазуучу жана нейропсихология тармагындагы адис.
Ал Twitch платформасында TheaBeasty деген ат менен түз эфирлерди өткөрөт. Instagram баракчасына 1,3 миллиондон ашуун адам катталган.
Жимми менен Тея 2022-жылы Түштүк Африкада таанышкан. Алардын алгачкы жолугушуусу жалпы достору уюштурган кечки тамак учурунда кокустан болгон.
Кийинчерээк MrBeast Теяга Рождество майрамында баш кошууну сунуштаган. Ошол күнгө Теянын Түштүк Африкадагы туугандары да атайын учуп келишкен.
MrBeast бизнесин YouTube менен гана чектебейт
Акыркы жылдары Жимми Дональдсон медиа тармагынан тышкары дагы бир нече багытта бизнесин кеңейтүүдө.
Ага таандык Beast Industries компаниясы Step аттуу финансылык технологиялар тиркемесин сатып алган. Бул долбоор жаштарга акча башкаруу, инвестиция, насыя жана жеке финансы боюнча түшүнүк берүүгө багытталган.
MrBeast өспүрүм кезинде инвестиция жана акча башкаруу боюнча жетиштүү билими болбогонун айтып, азыр жаштарга мындай маалыматты жеткиликтүү кылгысы келерин билдирген.
Мындан тышкары, Beast Industries компаниясы Feastables шоколад брендин, Beast Philanthropy кайрымдуулук долбоорун жана Beast Games шоусун өнүктүрүүдө. Ошондой эле компания технология, тамак-аш жана мобилдик байланыш тармактарындагы жаңы долбоорлордун үстүндө иштеп жатат.
