MCN Coin каржы пирамидасынын негиздөөчүлөрүнүн бири Исрадин Субанбеков жана Бегмат Мухтар уулу 5 жылдык пробациялык көзөмөл менен абактан бошотулду. Бул маалыматты 27-сентябрда Бишкек шаардык сотунун басма сөз кызматы тастыктады.
Соттун маалыматына караганда, тиешелүү чечим 18-сентябрда кабыл алынган. Субанбеков 14 жабырлануучунун акчасын кайтарып берген. Мындан тышкары, дагы 9 жабырлануучуга келтирилген чыгымды алты айдын ичинде төлөп берүүгө милдеттендирилген.
Эске салсак, 2025-жылдын февраль айында УКМК MCN Coin криптоактивине байланыштуу бир нече адамды кармаган.
Кийин ИИМдин маалыматы боюнча, аталган криптоактивге акча салган 898 адамга 1 млн 700 миң доллардан ашык каражат кайтарылган.
