Министрлер кабинетинин төрагасы Адылбек Касымалиевдин жетекчилиги алдында өкмөттүн кезектеги жыйыны өттү.
Отурумда Министрлер кабинетинин 2026-жылга карата иш-аракеттер планынын биринчи жарым жылдыктагы аткарылышы каралды. Президенттин администрациясынын саясий жана экономикалык изилдөөлөр башкармалыгы тиешелүү баяндама жасады.
Экспорттун артыкчылыктуу багыттары аныкталат
Жыйында Кыргызстандын өнөр жай кластеринин ишканалары үчүн 2026–2030-жылдарга карата экспорттук жана маркетингдик стратегияны бекитүү тууралуу тескеменин долбоору жактырылды.
Стратегия төмөнкү тармактардын экспорттук мүмкүнчүлүктөрүн кеңейтүүгө багытталган:
- фармацевтика;
- зергерчилик;
- эмерек өндүрүшү;
- айыл чарба продукциялары.
Документтин негизги максаты — ата мекендик продукцияны тышкы рынокко чыгаруунун артыкчылыктуу багыттарын аныктоо жана экспортту көбөйтүү.
Энергетика боюнча тапшырмалар берилди
Отурумда энергетика тармагындагы актуалдуу маселелер да каралып, тиешелүү мамлекеттик органдарга бир катар тапшырмалар берилди.
Адылбек Касымалиев алдыда Кыргызстанда эл аралык жана мамлекеттик маанидеги ири иш-чаралар өтөрүн белгилеп, Министрлер кабинетинин бардык мүчөлөрүн өзгөчө жоопкерчилик менен иштөөгө чакырды.
