Кыргызстанда тигүү тармагында иштеген ишкерлер жана маркетплейстер аркылуу товар саткан селлерлер 2026-жылдын аягына чейин бирдиктүү салыктан толугу менен бошотулушу мүмкүн.
Мамлекеттик салык кызматынын төрагасынын орун басары Кубанычбек Ысабековдун айтымында, жеңилдикти 1-августтан тартып киргизүү сунушталууда. Учурда тигүү ишканалары түшкөн кирешесинин 0,25 пайызын, ал эми маркетплейстерде иштеген ишкерлер 2 пайызын бирдиктүү салык катары төлөшөт.
Демилге кабыл алынса, эки категория үчүн тең салыктын өлчөмү жылдын аягына чейин нөл пайызды түзөт.
Ысабеков бул чара ата мекендик бизнести колдоого жана анын атаандаштыкка жөндөмдүүлүгүн жогорулатууга багытталганын белгиледи. Жыл аягына чейин тармактагы абалга байкоо жүргүзүлүп, андан аркы чечимдер ошого жараша кабыл алынат.
Wildberries кампаларындагы кырсык да эске алынууда
Салык жеңилдиги Орусиядагы Wildberries компаниясынын кампаларында товарлары күйүп кеткен кыргызстандык ишкерлерге да колдоо болушу мүмкүн.
18 жана 22-июлда Wildberries компаниясынын бир нече логистикалык борборуна дрондор менен сокку жасалган. Электросталь жана Котовск шаарларындагы кампаларда кыргызстандык тигүүчүлөр менен селлерлерге таандык товарлар да сакталган.
Учурда Кыргызстандын Экономика жана коммерция министрлиги Wildberries өкүлдөрү менен биргеликте кампаларда калган товарларды инвентаризациялоо жана ата мекендик ишкерлер тарткан чыгымдын көлөмүн аныктоо иштерин жүргүзүүдө.
Айрым кыргызстандык ишкерлер миллиондогон сомдук товарынан ажыраганын билдиришкен. Ошол эле учурда алардын кызматкерлерге айлык төлөө, ижара, насыя жана башка чыгымдар боюнча милдеттенмелери сакталып калууда.
Маанилүү: салыктын нөлгө түшүрүлүшү азырынча сунушталууда. Жеңилдик расмий күчүнө кириши үчүн тиешелүү чечим кабыл алынышы керек.
