Унаанын одометри 300–400 миң чакырымды көрсөткөндө эле мотору бүттү деген сөз эмес. Айрым моделдер туура тейлөө менен 400–500 миң чакырым жана андан да көп жүрө алат.
Муну статистика да ырастайт. iSeeCars дээрлик 400 миллион автоунаанын маалыматтарын талдап, кайсы моделдер 250 миң миль — болжол менен 400 миң чакырым — чегине көбүрөөк жетерин изилдеген. Тизмеде Toyota, Lexus жана Honda өзгөчө көп орун алган.
Төмөндө Кыргызстанда да колдонууга ылайыктуу, запастык бөлүктөрүн табуу салыштырмалуу оңой жана чоң пробегге чыдамдуулугу менен белгилүү 10 модель.
1. Toyota Land Cruiser
100 жана 200 сериялары дүйнөдөгү эң чыдамкай жол тандабастардын катарына кирет. Өзгөчө 4.7 литрлик 2UZ-FE мотору бар Land Cruiser 100 жакшы тейленсе өтө чоң пробегге жетет. Toyota өзү да Land Cruiser философиясынын негизине сапат, бышыктык жана ишенимдүүлүк коюлганын белгилейт.
Кимге ылайыктуу: начар жол, тоолуу аймак, узак сапар.
2. Toyota 4Runner
Рамалуу конструкциясы жана жөнөкөй агрегаттары менен белгилүү. Айрыкча 4.0 V6 1GR-FE мотору жакшы атка ээ. iSeeCars изилдөөсүндө 4Runner 250 миң милге жетүү мүмкүнчүлүгү боюнча эң жогорку көрсөткүчтөрдүн бирин көрсөткөн.
3. Toyota Highlander
Комфорттуу үй-бүлөлүк кроссовер болгону менен ресурсу олуттуу. 3.5 V6 2GR-FE версиялары туура тейлөөдө чоң пробегге чыдайт. Гибриддик Highlander болсо iSeeCars рейтингинде 250 миң милге жетүү мүмкүнчүлүгү боюнча алдыңкы үчтүккө кирген.
4. Lexus GX
Негизи Toyota Prado платформасында курулгандыктан GX люкс салон менен жол тандабастын бышыктыгын айкалыштырат. GX 470 жана GX 460 чоң пробег менен да суроо-талапта. Lexus GX узак кызмат кылган SUV моделдеринин арасында жогорку орунда турат.
5. Lexus RX
Кыргызстан үчүн эң кызыктуу варианттардын бири. RX 350 жана RX гибриддери ыңгайлуу, салыштырмалуу үнөмдүү жана ресурсу жакшы. Статистикада кадимки Lexus RX да, гибриддик RX да 250 миң милге жетүү көрсөткүчү боюнча орточо автоунаадан кыйла жогору турат.
6. Toyota Camry
Такси паркында Camry эмне үчүн көп экенин түшүндүрүүнүн кереги деле жок. Айрыкча XV50 кузовундагы 2.5 литрлик 2AR-FE мотору жөнөкөйлүгү жана ресурсу менен белгилүү.
iSeeCars рейтингинде Camry да, Camry Hybrid да узак кызмат кылган жеңил автоунаалардын катарына кирет.
7. Toyota Corolla
Күчтүү динамика эмес, бирок ээсине көйгөйдү аз жаратуу — Corollaнын негизги артыкчылыгы. Атмосфералык 1.6 жана 1.8 литрлик моторлорунун конструкциясы салыштырмалуу жөнөкөй. Corolla да 250 миң милден ашык жүргөн автоунаалар боюнча орточо көрсөткүчтөн жогору турат.
8. Honda Accord
Айрыкча 2.4 литрлик K24 мотору бар Accord версиялары чоң пробегге ылайыктуу. Жакшы каралган автоунааларда кыймылдаткычтын ресурсу абдан жогору болушу мүмкүн. Accord iSeeCars изилдөөсүндө да узак кызмат кылуучу седандардын алдыңкы катарына кирген.
9. Honda CR-V
Шаарга да, айылга да ылайыктуу универсалдуу кроссовер. 2.4 K24 мотору конструкциясынын жөнөкөйлүгү менен белгилүү. CR-V 250 миң милге жетүү мүмкүнчүлүгү боюнча SUV классынын орточо көрсөткүчүнөн кыйла жогору натыйжа көрсөткөн.
10. Honda Civic
Кичинекей мотор, жеңил кузов жана жөнөкөй конструкция. Айрыкча атмосфералык 1.8 R18 версиялары күнүмдүк колдонууга жакшы вариант. Civic узак кызмат кылган жеңил автоунаалар рейтингинде алдыңкы орундардын биринде турат.
Бирок «өлбөс авто» деген түшүнүк шарттуу
500 миң чакырым жүрө алган модель деле майы өз убагында алмаштырылбаса 150 миңде моторун ачтырышы мүмкүн. Ал эми жакшы каралган 300 миң чакырымдык авто кээде тарыхы белгисиз 120 миң чакырымдык машинадан кыйла жакшы болот.
Ошондуктан колдонулган авто сатып алууда одометрдеги санга гана ишенбеңиз. Мотордун компрессиясын, май басымын, муздактагы иштешин, түтүндү, антифриз менен майдын абалын, коробканы жана тейлөө тарыхын текшерүү маанилүүрөөк.
Эң негизги эреже: чоң пробегден эмес, начар тейленген автоунаадан коркуу керек.
