Кочкор районунда экспортко багытталган жаңы агрардык долбоордун алгачкы түшүмү жыйналууда. Кыргыз-чех биргелешкен «Экотер» компаниясы «Мамасыл тукум» чарбасынан 20 гектар жерди ижарага алып, анын 12 гектарына «Айсберг» салатын өстүргөн. Талаада сууну үнөмдөөчү тамчылатып сугаруу системасы колдонулууда.
Алдын ала маалымат боюнча, түшүмдүүлүк гектарына орточо 30 тоннага жетүүдө. Бул көрсөткүч бардык аянтта сакталса, 12 гектардан болжол менен 360 тонна салат жыйналышы мүмкүн. Бул — учурдагы орточо түшүмдүүлүккө негизделген эсеп.
Өстүрүлгөн продукциянын бир бөлүгү коңшу мамлекеттерге экспорттоло баштады, калганы Кыргызстандын ички рыногунда сатылууда.
