Бишкекте «Нелегал» рейдинин жүрүшүндө миграциялык мыйзамдарды бузган чет өлкөлүк жарандар аныкталды. Бул тууралуу УКМК билдирди.
5–19-август аралыгында өткөрүлгөн рейд учурунда 156 чет өлкөлүк жаран милиция бөлүмдөрүнө жеткирилген. Алардын ичинен 97 адамга административдик протокол түзүлүп, жалпы 1 млн 148,5 миң сом айып пул салынган.
Мындан тышкары, 20-августта «Нелегал Мото-курьер» аттуу атайын рейд өткөрүлдү. Анын жүрүшүндө дагы 48 чет өлкөлүк жаран жеткирилип, 33 административдик айып пул салынды. Айып пулдардын жалпы суммасы 322 миң сомду түздү.
Ошондой эле 10 мототранспорт жана 2 электр велосипеди милицияга киргизилди.
УКМК билдиргендей, миграциялык мыйзамдарды бузуу жана чет өлкөлүк жумушчу күчүн мыйзамсыз пайдалануу фактыларын аныктоо боюнча рейддер уланууда.
