Кыргызстанда жарандык пиротехниканын жүгүртүлүшүнө жаңы талаптар киргизилди. Тиешелүү токтомду Министрлер кабинети 10-августта кабыл алды.
Эми пиротехниканы атайын адистештирилген дүкөндөрдө гана сатууга уруксат берилет.
Ошондой эле ызы-чууга чектөө коюлду. Жумуш күндөрү саат 22:00дөн 07:00гө чейин, ал эми дем алыш жана майрам күндөрү 22:00дөн 09:00гө чейин уруксат берилген деңгээлден ашык ызы-чуу чыгарууга болбойт.
Жаңы эрежелер пиротехникалык буюмдардын коопсуздугу боюнча Бажы биримдигинин техникалык регламентине талаптарды шайкеш келтирүү максатында кабыл алынган.
Мурдагы, 2007-жылы кабыл алынган пиротехниканы жөнгө салган токтом күчүн жоготот.
Жаңы токтом 10 күндөн кийин күчүнө кирет.
